• Blogger templates

      .

      الجمعة، 11 مارس 2011

      رداً علي ما يقال عن انجازات المخلوع



      تتوالي نكات وافشات صفحة انا اسف "يا صلاح" قصدي "ياريس" قاموا بنشر صورة بها انجازات وهمية للمخلوع وهي كالتالي:


      • تطوير وترميم برج القاهرة "لمسة معمارية مميزة" ياسيدي ياسيدي 
      • مترو انفاق القاهرة والجيزة "افضل شبكة فى افريقيا" قسم ياعمدة كمان
      • مستشفي سرطان الاطفال 57357 "من اكبر المستشفيات عالميا" يا قلبي يابني
      • استاذ برج العرب "اكبر استاد فى افريقيا" هو بالكبر ولا ايه
      • السيادة الكاملة على سيناء "تحرير ارض سيناء بالكامل" وده من ايه يابني
      • اسكان مبارك للشباب "توفير مساكن للشباب" لاتعليق
      اولا برج القاهرة:
      صح مبارك طور البرج مفيش اي خلاف علي كدة بس بعد ماطوره وصرف عليه 15 مليون جنيه من 2006 حتى 2008 بس ياتري بعد ما طوره عمل ايه افاد بيه الشعب المصري ؟؟؟ لا طبعا كما تعودنا من الحرامي الكبير بتاع العمولات فلقد قام بتأجيره أو بمعنى أصح تم تخصيصه لمستثمر لبنانى وطبعاً تم رفع تذكرة الدخول جدا يعني عشان اسرة تروح ده مرتب شهر كامل وبتالي ايرادات هذا البرج لاتذهب الي مصر بل الي اجنبي يتحكم في احدي معالم مصر

      ثانيا مترو الانفاق:
      انا مش هتكلم علي سوء التهوية ولا عن الابواب المهكعة ولا عن وقوف المترو 10 دقائق علي المحطة وممكن ينزلونا ويقولوا عطلان ولا هقول ان المترو كان هيولع بيا قبل كدة وانا راكبه شهر 10 اللي فات لما حصل ماس كهربائي والكهرباء قطعت عنه والمترو بقي كتلة ضوء فوق طبعا ده ليه كل ده عشان اهمال مترو الانفاق مفيش صيانة كل ايراده بيروح للحرامية وكبيرهم ابسطها اخر حادث وقع فى عهد المخلوع "هبوط أرضى طوله 3 أمتار فى خط حلوان"

      ثالثا مستشفي سرطان الاطفال:
      طبعا اللي كاتب الانجاز ده مقدرش اقول عنه الا انه كاذب ومنافق لان من قام ببناء مستشفي سرطان الاطفال هم شعب مصر بتبرعاتهم  والله اعلم اذا كانت التبرعات كلها بتوصل ولا لأ حيث لم يتدخل المخلوع ولا شلة الحرامية فى بنائها اذن فهي اهلية 100%

      رابعا استاد برج العرب:
      اين هو من استادات جنوب افريقيا التي رأينها فى مونديال كأس العالم  اين هي من الملاعب التي تنوي قطر بنائها واذا كان عندنا ملعب رائع زي دي لماذا لم ننظم المونديال طبعا الحجة"الفيفا مرتشي الفيفا فاسد" لا ياحبيبي عشان كنت جايب عمر الشريف هو اللي يروج لمصر "اتنيلوا"

       خامسا تحرير سيناء:
      هاضرب مثل بسيط لو انا مدير فني كويس جدا ومعايا لاعيبة "كوركات" هل ممكن اكسب فى اي ماتش وكذلك الحال بالنسبة للمخلوع فطياروه هم من صنعوا النصر اما هو قام بجني الثمار فقط انما من تعرض للخطر من عرض نفسه للموت انهم طيارين مصر الشرفاء "قرفتونا بالضربة الجوية" على اساس ان مبارك هو اللي ساق الطيارات اللي عملت الضربة الجوية وبعدين هو مكنش فيه غير مبارك اللي بيحارب هناك بطولات تضرب بطولات مبارك بعرض الحائط وابحثوا عن:
      ( الرقيب / محمد حسين محمود سعد،العقيد الشهيد محمد زرد،الشهيد العريف سيد زكريا خليل،العميد يسرى عمارة،سيادة الشهيد سيادة العميد احمد حمدى،القرش.. عبد العاطى.. المصرى .. أشهر صائدى دبابات فى العالم،محمد المصرى,إبراهيم الرفاعى (اسطورة العمليات الخاصة))

      سادسا اسكان مبارك للشباب:
      ده بقي اكثر انجاز اضحكني جدا فكرني باعلانات زمان فى جريدة الاهرام يوم الجمعة "تنفيذا لبرنامج الرئيس مبارك وخدمته لمحدودي الدخل شقق لشباب تبدأ من 50 الف جنيه ياما انا وناس اعرفهم روحنا قدمنا فى اسكان مبارك ده ولحد دلوقتي مخدناش حاجة الاسكان ده كان اسكان وهمي او كان معمول للواسطة والمحسوبية للوزراء يعني لو الوزير رضي عن واحد يديلوا عشر وحدات كدة حلوين

      بس ليا عتاب ليه الادمن بتاع انا اسف يا صلاح جاب الانجازات ومجبش لمحة بسيطة عن فساد المخلوع


      وكمان ليا عتاب تاني على نفس الادمن ليه لم يقول لهم حديث الرسول صلي الله عليه وسلم عن ان المرء يحشر مع من احب



      وفي النهاية لاننا فى عصر الديمقراطية والحرية هما قالوا رأيهم واحنا كمان بنقول رأينا
      يعني "انجازاته الرأي" "والرد بتاعي الرأي الاخر" هههههههه
      وانا مش اسف يا مخلوووووووووووووووع

      1 التعليقات:

      لا ادري من اين ياتي هؤلاء بهذا الكلام الذي يناقض تماما ما يوجد على اردض الميذان و لله في خلقه شؤون

      إرسال تعليق

      حرية النقد والرد متاحة لجميع الزوار بشرط أن لا يكون الرد خارج نطاق الموضوع وأن يكون خال من الكلمات البذيئة

      اشترك في القائمة البريدية

      لا تنسى تأكيد الأشتراك من الرسالة التي ستصلك