عم محسن عميل وبالدليل

الجمعة, نوفمبر 04, 2011 تعليق واحد

ايوة انا عميل واجندة وجايب ليكم كل الادلة اللي تثبت ان انا عميل

1- انا عندي تي شيرت ماركة جيوردانو زي اللي في الصورة جالي هدية من خارج مصر "واخدين بالكم من الاسد الماسوني" عميل انا ولا مش عميل

2-لابس حظاظة في ايدي اليمين زي اللي في الصورة حد له عندي حاجة اصل انا ماسوني كمان "بس هو يعني ايه ماسوني؟"

3-اخويا مسافر ولسة باعتلي 100 دولار عيدية العيد تمويل خارجي من برة اهو دليل ده ولا مش دليل

4-وانا بذاكر لابن عمي قولت له ان مصر "مقسمة" الي وجه بحري ووجه قبلي ورسمتها له علي الخريطة "يالهوي" قمت باظهار نيتي الحقيقة لتقسيم مصر

5-انا المتسبب في احداث ماسبيرو ودي صورتي قدام ماسبيرو وانا في بولع في العربيات اصلي تدربت برة علي اشعال الفتنة وكمان اسرق مدرعة الجيش واركبها

6-انا المتسبب في احداث السفارة الاسرائلية ودي صورتي وانا بحدف طوب علي الامن المركزي والجيش لكي احدث الوقيعة بين الجيش والشعب

انا ببساطة ياجماعة عميل وايد من الايادي الخفية "حد له شوق في حاجة"

»تابع القراءة

نصيحة من عفريت الفانوس !!!

الأربعاء, أكتوبر 12, 2011 لا توجد تعليقات

ربنا كرمني ولاقيت الفانوس السحري وقلت هو ده الحل اللي بيه هغير سلوك الشعب المصري عشان زهقت من كتر الكلام والنصح,المهم مسكت الفانوس ودعكته جامد طلع لي العفريت وقالي "شبيك لبيك عبدك وبين ايديك تطلب ايه" قولتله طلع ورقة وقلم واكتب ورايا:-

•  محدش من الشعب يرمي زبالة مش الشارع ولو حتي ومنديل
• ياريت الناس تبتسم  في وجوه بعضها وعمرهم مايتخانقوا
• الكل يحترم القانون
• وياسلام بقي لو خليتهم ينزلوا من باب النزول ويطلعوا من باب الصعود في المترو 
• محدش يقعد ابنه الصغير في الاوتوبيس وراجل او امرأة كبار في السن واقفين ولو فيه شاب قاعد يقوم للاكبر منه
•  الناس اللي عندها عربيات تحترم قوانين المرور ويعاملوا بعض باحترام
• نفسي الباعة الجائلين يكون ليهم مكان خاص بيهم وميقعدوش علي الطرق والارصفة عشان الزحمة
• والشباب مايعكسوش البنات في الشارع واختفاء التحرش من مصر
• والتجار يكون عندهم ضمير ويبيعوا بالاسعار المعقولة
• اعضاء مجلس الشعب يدخلوا البرلمان عشان البلد والناس مش عشان مصلحتهم الشخصية
• الاحزاب تشتغل عشان المواطنين مش عشان يحققوا اهدافهم ومصالحهم هما بس
• الجيران يعاملوا بعض كويس ولايكون فيه عشوائيات في مصر
• الخ,,الخ,,الخ,,الخ,,الخ,,الخ

فجأة العفريت ساب الورقة والقلم وقاطعني وقالي:-

بص بقي من طلباتك عرفت ان عندكم ازمة في "الاخلاق" ولو اجتمعت عفاريت الدنيا كلها عشان تمنحكم الاخلاق مش هتعرف لازم تغيروا من نفسكم وتفتكروا القيم والاخلاق اللي انتوا نسيتوها عشان طلباتك دي تتحقق.وقالي كمان اوعاك تزهق من الكلام والنصح لو واحد اتغير من وسط عشرة ده يعتبر انجاز لان الواحد ده هغير كمان واحد واثنين وثلاثة.,,,,الخ

عشان كدة لازم ننصح بعض عشان نغير من سلوكنا مش معقول الشعب اللي عمل ثورة وبعد ماخلصها نظف مكانه يتقال عليه ده بيرمي زبالة في الشارع ولا بيتخانق مع بعضه ولا ولا ولا.

ياتري امتي هنتغير؟

»تابع القراءة

متي نفهم ان العبرة ليست بالسلاح؟

الأحد, أكتوبر 09, 2011 لا توجد تعليقات

سألني صديق لي "هل نستطيع هزيمة اسرائيل لو نشبت الحرب بيننا؟" فكان جوابي هو "نعم بالتأكيد".فضحك صديقي وقال متهكماً "هما دول المصريين"رديت عليه وقولتله "وليه منعرفش نهزمهم؟" وطبعاً كانت الاجابة المعتادة من بعض المصريين المتشائمين هي ان "اسرائيل عندها اسلحة متقدمة عنا"
مش صاحبي بس اللي متشائم كدة انا لاحظت من التعليقات علي الفيس بوك وكلام الناس في الشارع ان فيه عدد كثير قوي منا يعتقد بأن احنا لو دخلنا حرب مع اسرائيل هنتهزم عشان السلاح للاسف الناس مش قادرة تفهم ان "العبرة ليست بالسلاح"
ولنأخذ حرب اكتوبر مثالاً هل كنا متقدمين في السلاح؟ الاجابة هي لأ طبعاً وبالرغم كدة حاربنا وانتصرنا علي اسرائيل اللي كانت مسلحة باحدث الاسلحة ومنظومات الدفاع وقتها ولكن كل هذا لم يقف اما ارادة الله.
فلو قارنا بين الطيران المصري والاسرائيلي في 1973 سنجد ان اسرائيل كانت متفوقة فى عدد و نوعية الطائرات حيث كانت تمتلك اسرائيل احدث طرازات الميراج الفرنسية و الفانتوم و الفالكون الامريكية  اما مصر كانت تمتلك طائرات ميج 17 و ميج 21 و سوخوى الروسية العقيمة ومع ذلك تفوق الطيارين المصريين من ناحية التدريب القتالى و استغلال الامكانيات الخاصة بطائراتهم على الطيران الاسرائيلى المكون من الانواع التي ذكرناها سابقاً اذن العبرة هنا ليست بالسلاح فقط لكن بالقدرة على استخدامه والايمان بالله الذي يعد اعظم سلاح نمتلكه، وكفي فقط ترديد كلمة "الله اكبر" التي كانت تزلزل العدو وتلقي الرعوب في قلوبهم اثناء الحرب.
 ولنتذكر قول الله تعالي { قَالَ الَّذِينَ يَظُنُّونَ أَنَّهُم مُّلاَقُوا اللهِ كَم مِّن فِئَةٍ قَلِيلَةٍ غَلَبَتْ فِئَةً كَثِيرَةً بإِذْنِ اللهِ وَاللهُ مَعَ الصَّابِرِينَ }

»تابع القراءة

افلام عربي..ام الاشتغالات

السبت, يوليو 02, 2011 لا توجد تعليقات

في البداية اتمني اتمني ان تعذروني لهذا الانقطاع الطويل نتيجة ظروف خارجة عن ارادتي.
لم ارغب ان ابدأ بالكتابة عن السياسة او مايدور الان في البلد لاني أشعر بالإحباط لذلك حبيت ابدأ بالتدوين عن حاجة لاحظتها في كل الافلام العربي تقريباً غريبة ومضحكة في نفس الوقت.
في يوم كان اخي يشاهد فيلم نور عيني وكنت جالس لكني لم اكن مهتماً بالفيلم ولكن ما جذبني هو ان البطلة في الفيلم عاد اليها بصرها بعدما كانت عمياء.
وفي يوم اخر كنت اشاهد فيلم الشموع السوداء وفجأة عاد بصر البطل مرة اخري في ليلة عاصفة.
ولم يختلف فيلم صباحو كدب ايضا عن ذلك بل وزاد الامر فبعدما عاد بصر البطل ذهب منه مرة اخري.
وغيرها من الافلام العربي التي تسير علي هذا النمط مما دفعني للسؤال ليه دايماً البطل بيرجعله بصره تاني قبل نهاية الفيلم وليه دايما لما يرجعله بصره تكون الدنيا بتمطر والبرق والرعد شغال,حاجة غريبة مش كدة؟
نفسي مرة اكمل فيلم عربي يكون فيه البطل اعمي ويفضل لغاية اخر الفيلم اعمي مايرجعلوش بصره لكن اظاهر كدة ان الروتين بقي شئ اساسي في حياتنا ودخل كل المجالات حتي الفن زي الكوسة بظبط اللي مش عارفين لسة ياتري هنبطل نزرعها بعد الثورة ولا هي اللي هنفضل نحصدها من كل اللي نزرعه؟

»تابع القراءة

ثورة ضد نفسك ومن حولك

الثلاثاء, مارس 08, 2011 لا توجد تعليقات

انهاردة لما نزلت وشوفت سلوك الناس اللي من "الجيل القديم" فى الشارع  ايوة من الجيل القديم!!! اللي متغيرش بعد الثورة اللي لسة سلوكه زي ماهو اللي اثبت انه لازم يتهان عشان يمشي صح.
للاسف حزنت من الناس التي لم تحترم دماء الشهداء الذين ضحوا بحياتهم من اجل ان نحيا احرار واقتنعت اننا لم نكن بحاجة الي ثورة ضد النظام فقط ولكن كنا بحاجة ايضا الي ثورة ضد انفسنا وضد من حولنا سواء كانوا من (الاقارب,الجيران,الاصدقاء,...الخ)
هل فعلاً صدق ما كان يقال علي الشعب المصري انه شعب فوضوي وان لابد من وجود الشرطة حتي يحترم القوانين؟
بدأت اصدق هذه المقولة للاسف اتمني من كل شخص ان يجلس مع نفسه ويتذكر الشهداء ويسأل نفسه لماذا ضحوا بحياتهم؟ وان يرد لهم قدر قليل جدا مما فعلوه بأن يعيد تقييم سلوكه وتغيره الي الاحسن.
هل ده ممكن يتحقق؟؟؟ اتمني.

»تابع القراءة

احذر من هؤلاء!!

الخميس, مارس 03, 2011 لا توجد تعليقات

امبارح كان ورايا مشوار المهم ركبت الميكروباص عشان يوصلني محطة المترو عشان كنت مكسل امشي وبعدين السواق وهو ماشي شاف سواق ماشي غلط فقال كل واحد دلوقتي ماشي بمزاجه هو قال كدة وراح شاب قاعد جنبي اتكلم بس كلام غلط ودار بينا حوار كالتالي
الشاب: اه يا اسطي ماهي دي الحرية اللي هما عايزينها
انا: (ساكت)
الشاب: كل واحد دلوقتي عايز يمشي بمزاجه
انا: (ساكت)
الشاب: فين بقي بتوع التحرير يجوا يشوفوا البلد اللي خربوها
انا: لا اهدي بقي كدة بلد ايه اللي خربت ومين اللي خربها؟
الشاب: الشباب بتوع المظاهرات
انا: يراجل؟ شباب التحرير هما اللي خربوا البلد علي اساس ان شباب التحرير هما اللي سرقوا 70مليار وهما اللي نهبوا البلد وهما اللي افسدوا فيها وهما اللي غلوا الحديد والاسمنت وهما اللي غلوا الاسعار وهما اللي دخلوا مواد مسرطنة وهما اللي صدروا الغاز الي اللي متتسماش وهما اللي خرجوا المساجين وأجروا البلطجية وقالو للشرطة ونبي متنزليش تاني وانسحبي من الشوارع
قام مغير الموضوع ومرضتش اضغط عليه عشان يجاوب علي سؤالي قبل ما يغير الموضع
الشاب: اه ماهي الحكومة هي اللي عايزة كدة وهي اللي مش راضية ترجع الا لما الشعب يبوس ايديها عشان ترجع
انا: طيب اديد شفت اهو يعني انت عايز الشطرة ترجع تاني ومايبقاش لينا كرامة فى البلد
الشاب: احنا اساسا شعب فوضوي لازم يضرب عشان يمشي ويشتغل
انا: ماهو ده اللي قعدوا يعلموه لينا طول حياتنا واحنا لو شعب فوضوي كان الزعماء والشعوب الاجنبية تشيد بثورة المصريين واحنا لو شعب فوضوي كنا نظفنا مكانا فى التحرير ونخلي شبكة زي ال C.N.N تقول اول مرة نشوف شعب ينظف مكان ثورته وبعدين انت كان
قام مغير الموضوع تاني
الشاب: ماهو الشباب عايزين ايه دلوقتي غير انهم يقعدوا في بيوتهم واهاليهم بصرفوا عليهم
انا: يعني شباب مصر عايزين يقعدوا فى بيوتهم اومال هما ليه اساسا عملوا الثورة مش عشان يلاقوا شغل فى مكان محترم وبعدين انت كان عجبك حالك فى النظام القديم لما متعرفش تلاقي شغل و لما تخش قسم تتهان جوة والظابط يضربك على قفاك و يخش بيتك بفتشه ولا تقدر تقوله 1/3 الثلاثة كام
الشاب: ما انا اخويا مات جوة القسم بس هو كان مريض واللي كان بيعملنا الاجرائات هما الظباط
انا: وانت ايش عرفك ان هو مات من مرضه وبعدين ماهو واجب عليهم هما اللي يعملوا الاجرائات اولاً عشان ده واجب عليهم لانه مات عندهم ثانياً عشان مايجبوش لنفسهم مصيبة
ونزل معايا مكان ما انا نزلت وكملنا الحوار
الشاب: اشمعنا الثورة دي محصلتش الا دلوقتي ليه محصلتش ايام ازمة الغاز وازمة الطاطم ...الخ هي حلصت دلوقتي عشان بنقلد تونس
حاولت ابسطهاله شوية ومتكلمش كلام كبير
انا: وهي الناس كانت ساكتة يعني ايامها!! وبعدين احنا لما لاقينا الثورة نجحت فى تونس وجابت نتيجة عملناها عشان زهقنا  واحنا اساسا احق دولة عربية تعمل الثورة دي لاننا افقر دولة واكثر دولة الناس فيها بتتهان
وفي الاخر بس قبل ما امشي احب اقولك بلاش تسمع كلام الناس اللي مش فاهمة الناس اللي اتضحك عليها ومتبقاش نظرتك تشاؤمية كدة بكرة تشكرنا على الثورة اللي احنا قومنا بيها دي وتندم علي الكلام اللي انت بتقوله دلوقتي
الشاب:: انا نظرتي مش تشاؤمية بس هي دي الحقي...ق
انا: لا لا لا لا متقولش ان دي الحقيقة متظلمناش وتظلم الشهداء اللي ضحوا بحياتهم عشان مصر تبقي حرة

ايه رأيكم فى الحوار اللي حصل ده ايه رأيكم فى عينة من الناس اللي مخدوعة فى شباب التحرير الناس دي اللي بتتهمنا ان احنا اللي وقفنا البلد واحنا اللي خربناها عشان كدة احذر من الناس دول او اتبع المثل اللي بيقول:
انصح صاحبك من الصبح للظهر وان مقبلش سيبه يغرق بقية النهار

»تابع القراءة

ابكي انزف اموت وتعيشي يا ضحكة مصر

السبت, فبراير 19, 2011 لا توجد تعليقات

 صحيت من النوم يا مصر حسيت بشوق رهيب تجاهك  قمت وعايز احضنك واحس بحنان حضنك واقولك وحشيتنى يا ام الدنيا بالرغم انكِ كنت ساعات بتقسي عليا الا انى عمري ما اشتكيت وفضلت احبك وكل ما زادت قسوتك عليا زادت غلاوتك وحبك فى قلبي ومهما كتب قلمي ومهما قال لسانى عمري ما هوفيكي حقك عليا يا ام الدنيا يشهد ربنا يا مصر اني عمري ماكنت عاق ناحيتك حتى قبل ماتقوم ثورتك ويشهد ربنا ان علمك دايما فى قلبي يشهد ربنا ان اقسمت على حمايتك فى اي خطر وانني مستعد يا مصر ان اضحي بحياتى من اجلك يا ام الدنيا فدمائي يامصر تهون عشانك وان شاء الله يامصر انا وباقي ولادك نشتغل بكل طاقتنا عشان نبنيكِ لأجل ما تعودي لينا 

واخيراً احب اقولك يا ام الدنيا اني مش عايز اتوقف عن الكتابة ابدا فى حبك ولو فضلت اكتب فى حبك ابد الدهر لن امل يا أمي

»تابع القراءة

بطل رغي شوية

السبت, يناير 22, 2011 لا توجد تعليقات

 زوار المدونة الكرام اعتذر لكم عن عدم المواظبة فى التدوين وذلك لأننى مشغول جدا هذه الايام

 انهاردة هتكلم عن ظاهرة غريبة جدا فى بعض الناس وهى الرغى بنقابل كتير قوى فى حياتنا ناس رغاااااااااااااااااااااية جدا ناس يصح عليهم لقب راديو بنقابلهم فى كل مكان فى البيت فى الشغل فى المواصلات ... الخ
وهاحكي لكم عن اسوء موقف حصل ليا مع الرغايين
 قبل كدة افتكر لما كنت فى الجامعة لما كنت واقف مع اصحاب ليي جاء وقف بجوارنا شخص
 سألنا انتم سنة كام فقلنا له احنا كذا
قعد بقى يكلمنا عن المواد بتاعة السنة دى قلنا مش مشكلة الراجل بينصحنا
وبعدين سألنا مين الدكاترة بتوعكم قلنا له فولان وفولان وفولان قعد يكلمنا عن تاريخ دكتور دكتور وبعدين بقى طول قوى حبينا نخلع قلت لصديقى مصطفى انا عايز اروح البنك الاهلى وياريتنى (طلع كان شغال فى البنك الاهلى) قعد بقى يقولنا اللى حصله فى البنك ورئيس مجلس الادارة معرفش ماله وكومبيوترات البنك مالها وكان يوم مايعلم بيه اللى ربنا المهم انا قمت مشيت عشان احاول افهمهم ان كدة حرام 3 ساعات بيتكلم وشوية رجعت لافيته لسة بيتكلم مع صاحبى ندهت لصاحبى صاحبى جاى عليا الاقى الراجل ده ماشى معاه كل ما نروح فى حتة يجى معانا ومش بيفصل ينهار ابيض المهم بقى فكينا من الراجل ده ازاى انا هاقولكم
(انا مشيت ورحت جبت صحاب تانيين كانوا وصلوا لتفاصيل المواد وهنجوا وبعدين روحنا قدام مدرج كان فيه رعاية الشباب واتفقنا انى اخش واعمل نفسى اعمل حاجة واتأخر وتيجوا واحد ورا واحد واخر واحد معها يقولوا ثوانى وجايلك ونخرج من الباب الثانى وكانت هى الخطة والحمد لله نجحت ومن ساعتها باقى سوات الجامعة اللى قضيتها مكنتش بفتح حوار مع حد ابدا)

انا بس ليا سؤال الناس دى فمها مش بيوجعها

وعجبى على الرغى :))

»تابع القراءة

وبعد الخناقة يا أفندية؟

السبت, يناير 08, 2011 تعليق واحد

 كتير وانا ماشى فى الشارع الاقى مثلا سواق عربية خبط فى عربية سواق  تانى يقوموا بقى الاتنين ينزلوا (وويك ويك ويك ياولود كذا وياولود كذا) واخر بهدلة ومش عارف انا اخر الخناق ده ايه قمت دخلت فى مرة خناقة من دى احوش بينهم المهم قلت للراجل اللى اتخبط ياعم الراجل اللى خبطك بيقولك معلش يقولى اعمل ايه انا يعنى بالاسف وبكلمة معلش دى اروح للراجل اللى غلطان طب ياعم ممكن تصلح عربيته على حسابك يقول لى ماشى مفيش مشكلة اروح اقول للى اتخبط هو هيصلح العربية بتاعتك على حسابه يقولى انا مش بقبل العوض الله!!! اومال انت عايز ايه ياعم الحاج انت بتقولى انا مش عايز حاجة اومال بتتخانق ليه مع الراجل من الاول يقولى مش حقى 

قلتله لأ طبعا مش حقك الراجل اتأسفلك مقبلتش اعتذاره عرض انه يصلح العربية على حسابه قلت مش بقبل العوض يبقى حقه هو اللى يتخانق معاك مش انت! الراجل  اللى غلطان بقى سمع الكلمة دى واتحجج وقام صارخ وقال لى تقول ايه يا استاذ ناس بهايم بعيد عنك
وقامت الخناقة تانى وجيت اخلص تانى كنت هاتضرب ومن ساعتها لما الاقى اى خناقة مش بدخل احوش عارفين ليه!!
 لانى صدقت المثل اللى بيقول

ماينوب المخلص الا تقطيع هدومه

وعجبى 

»تابع القراءة

المجتمع وعنفه ضد الحيوانات

الاثنين, يناير 03, 2011 لا توجد تعليقات

طبعا انتم متعرفوش انى بحب الحيوانات جدا وانى بربى كذا نوع منهم لان الحيوانات بأنواعها وفية جدا اوفى من البشر وكثيرا اثناء خروجى اشاهد الناس فى مجتمعنا بيعاملوا الحيوان كأنوا مش بيشعر يعنى ممكن تلاقى عربحى عمال يكربج الحصان او الحمار اروح اقله ليه ياعم كدة بس يقولى وانت مالك اقول له حرام يقولى ملكش دعوة قلتله ترضى حد يعمل فيك كدة الراجل سكت معرفش يقول ايه واساسا يكون الحصان او الحمار مش عارفين يمشوا من ثقل الحمولة وتلاقى مثلا واحد بيطرد كلبة حامل من حوش بيته عشان متولدش فيه ويكسر عليها عصا المكنسة والاطفال ياسلام على الاطفلا تلاقيهم بقى رابطين كلب من رقبته والكلب هيتخنق ويضربوا فيه ويجروه ولا حد يقول لهم انتم بتعملوا ايه وغيرها كتير من الافعال التى لا توصف غير أنها قلة ادب وقلة علم بالدين

هى الناس دى مسمعتش عن قصة الراجل اللى دخل الجنة عشان سقى كلب عطشان والمراة اللى دخلت النار عشان حبست قطة اساسا لو فكروا شوية هيعرفوا ان الحيوانات دى احسن منهم على الاقل مش بتخون ولا بتحاول تأذى ولا تضرب اسفين للمدير فى الشغل عشان يضرك ولا بتاخد رشوة عشان تمشى مصالحك ولا أى حاجة كل اللى بتعوزوا اكل ومياه ورحمة وعطف بيهم

 على رأى احمد مكى لما قال

عمرك شفت خرتيت اتجوز خرتيتة عشان تصرف عليه ولا عمرك شفت كلب بلدى اتجوز كلبة المانى عشان ياخد الجنسية

ودى من عندى "عمرك شفت ضفدعة حبت ضفدعة عشان العوامة اللى عندها على البحر" عالم بسيط جدا لايسعى الى سلطة او مال او جاه

بس للاسف نقوم بتعذيبهم وذلهم كما لو اننا ملكناهم ثقافة سيئة توارثتها الاجيال ولكن حان الوقت لكى نغير هذه الثقافة

واخيرا السؤال الذى يجب ان اوجه لكل من يقوم بهذا الفعل الشنيع

"لو انت مكانه ترضى يتعمل فيك كدة"

وعجبى 

»تابع القراءة

رسوم فتح مشاهدة

الجمعة, ديسمبر 31, 2010 لا توجد تعليقات

السلام عليكم اعزائى القرااااااااء عاملين ايه انهاردة كنت على القهوة الصبح وشربت كوباية الشاى الحلوة وندهت على الواد بلبل خد يا بلبل الحساب وجهز نفسك بليل عشان هنتفرج على الماتش قال لى بص ياعم محسن من الاول كدة عشان منزعلش من بعضينا كوباية الشاى 3 جنيه غير فلوس الماتش

قلت ماشى مش مشكلة ال 3 جنيه طب وفلوس الماتش كام يابلبل قال لى:5 جنيه طبعا انا رحت قلت لفظ اعتراض شائع فى مصر وقلتله ليه يابلبل وانا هتفرج فى استاد ويمبلى ولا ايه

قال لى: المعلم  هو اللى حاطط الاسعار رحت للمعلم ايه يامعلم اللى الواد بلبل بيقوله ده يعنى ايه كوباية الشاى 3 جنيه ورسوم المتاش 5 جنيه
 قال لى المعلم: ياعم محسن دى مناسبة بنستناها من الموسم للموسم عشان نعمل مصلحة
 قلتله ايوة يامعلم طب ال 3 جنيه مش مشكلة نعتبر الشاي مستورد انما ال 5 جنيه رسوم فتح مشاهدة ولا ايه وياترى بقى يامعلم هتحاسبنا على الدقيقة بكام
قال لى: معلش ياعم محسن بقى هى دى اسعارنا ولو مش عاجبنك اتفرج فى بيتكم 
قلتله طب انا عايز اتفرج مع حبايبى واصحابى الحاج ابراهيم الحاج خميس
قال لى:خدهم عندك فى فى البيت وفرجهم عندك
من هنا لـ هنا مشينا الكوباية على 1.5 وفلوس الماتش 2 جنيه ومن ساعتها وانا بفكر افتح قهوة واجيب بروجكتور وشاشة عرض كبيرة وخلى مشاهدة ماتشات الدورى المصرى 5 جنيه لاول نصف ساعة وكل دقيقة ب 15 قرش اما الدورى الانجيليزى عليه 2 جنيه جمارك

وعجبى

»تابع القراءة

اقترح موضوع عايز عم محسن يتكلم فيه

الاثنين, ديسمبر 27, 2010

لكل واحد نفسه فى حاجة اقترح موضوع عم محسن يتكلم فيه وعم محسن طبعا راجل ديموقراطى جدا مش بيحب يزعل حد ارسل الموضوع اللى انت عايز عم محسن يتكلم عنه من هنا  وطبعا الموضوع فى اى مجال وفى اي حاجة بس يستحسن يكون في السياسة عشان عم محسن مش بيخاف من حد وتانى يوم تلاقى عم محسن بيتكلم عن الموضوع ده يعنى بمعنى اصح عم محسن شعاره هنا “قول اللى فى نفسك,فضفض عن نفسك” ماشى يا رجالة وان شاء الله تكون ايامنا الجاية مع بعضينا حلوة وعسل ان شاء الله وعم محسن يفيدكم فى الحياة ومجالاتها وقريب هتلاقوا موضوع بعنوان “اطلب استشارتك من عم محسن”
مع تحيات عم محسن

»تابع القراءة

هزار تقيل جدا!

الأحد, ديسمبر 26, 2010 لا توجد تعليقات

كتير من فى الحياه بيمر بهزار تقيل جدا اما بقى من صاحبه او من اخوه او من جاره او حتى من زميله فى الشغل وانا فى رحلتى الطويلة لم اجد ارخم وابوخ من الثلاث مواقف اللى هحكيها ليكم دى

الموقف الاول:

راجل فى منتصف الاربيعينات وخلاص هيجوز المهم زميله فى الشغل اعطاه ملين قوى جدا على انه منشط عشان ليلة الدخلة والراجل صدق وخد منه فى ليلة دخلته والراجل اصيب طول الليل باسهال حاد والناس مكنوش عارفين يعمله ايه وكان هيجليه جفاف لحقوه بلمون وبقم يدليه لمون كتير جدا طبعا ما اوصفلكوش الراجل ده بس كل اللى اقدر اقول لكم ان الراجل ده لما كان حد يمسك لمون قدامه فى البيت او الشركة ويغيظه  كان بيجرى وراه بالعصاية

الموقف التانى:

واحدة زميلة واحد فى الشغل اتفقت هى وباقى زمايلها فى الشغل انها هما يعملوا مقلب فى زميلهم ده تخيلوا ايه المقلب ده راحت لبيت مراته وخدت عيالها وخبطتت وقالت الراجل ده متجوزنى ومخلفة منه العيال دى وسايبنى ومش بيصرف عليا والبيت كان هيتخرب وكان واقف على طلاق وحكايته حكاية واخيرا اتحلت المشكلة عرفت مراته انه هزار بس هزار رخم شوية

الموقف الثالث:

اتنين صحاب وواحد منهم بيتجوز ويوم فرحه راح حاطط ليه مياه كرسى فى كرسى العربية وتخيله بقى انتم الموقف اللى حصل ميتوصفش فى العربية طبعا الفرح كله كان هيفركش قبل ما يحصل الفرح اساسا بسبب انت العريس مش عارف يقعد كويس فى العربية من الاكلان الى فيها وكويس انها مجتش فى العروسة لانه كان حاطه فى ناحية العريس

وكله هزار فى هزار بس هزار رخم جدا

»تابع القراءة