الخميس, أبريل 21, 2011
ليه بقي؟ لانه هو كمان شارك في الثورة "زي ما بيقول" ومحدش عبرة ولا حد فوضه يتكلم باسم الثورة زي وائل غنيم.
علي فكرة ممكن اي حد ماشي يقولك انا شاركت في الثورة بس اكيد اللي شارك في الثورة كان موافق علي كل مطالبها اذن لماذا الشخص ده اللي اسمه احمد سبايدر يهاجم الثوار لانهم طلبوا اقالة احمد شفيق "اللي كان جزء من الثورة المضادة وكلنا عارفين كدة كويس" ولماذا يقول علي الثورة التي دعا اليها وائل غنيم "فوضي خلاقة" وان وائل غنيم يقدم "السم في العسل" وانها "مؤامرة علي مصر"
يبقي ازاي انت شاركت فيها وكنت مقتنع وموافق علي مطالبها طالما هي مؤامرة علي مصر "مش حاجة تحير"
انا هاقولك يا سبايدر انت محدش عبرك ليه بس بعد مانشوف الفيديو ده
زى ما واضح فى الفيديو اسلوب هذا الشخص المستفز وعدم موضوعيته وثقافته المحدودة وافتقاده ايضاً لادب الحوار الذى لا يمثل ابدا اخلاق الثورة بس العيب مش عليه لوحده انما ايضا العيب على تلك القناة التى تتوالى فضائحها وتتساقط شعبيتها الضئيلة فى الاصل ، وسذاجة الحوار وسياقته الوضيعة وافتقاده لاى جوهر
نشوف بقي صورة المناضل الثائر احمد سبايدر اللي زعلان ان الناس بتحب وائل غنيم وانه مشهور و كمان بيتهمه انه عميل وماسوني وانه مرتاح ماديا ومش محتاج يعمل ثورة وانه متأمر علي مصر وغيرها من الاتهامات اللي احنا عارفينها
ملحوظة:
انا وضعت رتوش ولون اسود علي اجساد الفتيات اللي معاه عشان انا محترم وزوار المدونة محترمين وعلي فكرة دي اكثر صورة محترمة ليه وكان فيه صور اكتر من كدة ليه ولبنات "بيدعي انهم الفانز بتوعه" في اوضاع مخلة منتشرة في الانترنت وقد حذفتها حرصا علي الاداب العامة
يا سلام لا فعلا مناضل بس اصله كان خرمان شوية ومحتاج كأسين عشان يعدل الطاسة
- وعندي ليك شوية اسئلة اخيرة يامناضل نفسي اعرف اجابتها منك:
تعرف انت ايه عن الماسونية؟ وماهو دليلك علي ان وائل غنيم ماسوني؟ اوعي تقولي التيشيرت اللي هو لابسه والنبي,عشان انت لو قولت التيشيرت هيتقال عنك كلام وحش لان التيشيرت ده تيشيرت عادي جدا "ماركة Giordano" زيها زي "nike" و"adidas" وغيرهم كتير وبلاش الحظاظة لان نصف شباب مصر لابسين حظاظات ههههههههههه
سبايدر "خد فطيرك"
التصنيفات: الحال المايل
19 التعليقات:
هو ده نفس الشخص بتاع المدونة اياها ؟
------
بمناسبة الحظاظة " الاسورة " دي بتتباع و فلوسها بتروح تبرعات لمرضى السرطان
@محمد الدهيمي
لا مش نفس الشخص اصلهم كتروا قوي اليومين دول
--------
وبالنسبة للحظاظة دي متعرفش فين اماكن بيعها؟
ده الرابط
http://www.choosehope.com/
عايزة اعرف الاشكال دى منين كل واحد بقة بيكلم ع البلد انا لو كان معايا مدونة كنت كتبت تعليق على كل كلمة قالها بس انا عايزة اعرف هو كان عايش فالبلد ولالاة مشفش الفسادوالسرقةوالامراض والشرطة اللى مبتعرفش ربناانا مش هدافع عن وائل غنيم بس اناعايزاه يعرفنى هل فى علاقةبين وجوده ف شرم ووجود مباركوعايزاه يعمل فيلم وثائقى عن علاقة مبارك باليهودوعلاقته بامريكاوعايزة اساله انه يعرف ان سوزان مبارك شريكة لبيل كلنتون فى مشاريع تجاريةواية السبب اللى يخلى جمال مبارك متاثر بامريكا اكتر من مصر وفلوس علاء مبارك اصلها منين وعازاه يسال توفيق عكاشة انت بتبوس ايد صفوت الشريف اللى من النظام اللى عنده غباء سياسى قبل ما يحاسب وائل واسماء يجاوبنى على اسئلتى انا مش عايزه اديله اكبر من حجمه بس انا استفزنى كلامه المناهض لكل اللى عيشناه انا مش عايشه ف مصر هجيت من اللى شوفته بس ان شاء الله رجعة
انا عايز اعرف هو بيسال عن مين اللى بيمول الثوار وانت يا جميل مين بيمولك ولا بيعمل كدة لله فى لله حسبنا الله ونعمى الوكيل يحيا كل شاب مصرى ثار على اى فساد ويرحم الله كل شهيد
@غير معرف
مرتضي منصور هو اللي بيموله اصل احمد سبايدر حبيب مورتا
هو المشكلة فى سبايدر كشخص ولا الكلام والفيديوهات اللى جابها على ولاد الكلب الخونة اللى بيقبضوا من امريكا تركتوا الاصل واتكلمتوا فى التفاهة .. الموضوع هو ما قدمة من صور وتسجيلات للخونة بتوع فريدم هاوس ..ومش مهم يطلع رقاص ولا زمار ولا صبى عالمة حتى..الحديث هو حديث الخيانة واللى ضد الحاجات الوسخة دى يبقى خاين مع مرتبة الشرف
كل اصحاب التعليقات السابقة واضح ان كلهم تبع الخونة زالعملاء زمش عاوزين يتكلموا فى الموضوع الاصلى بتاع الخيانة والعملاء ونازلين شتيمة وبهدلة فى الواد علسان يضيعوا ويتوهوا الموضوع الاصلى
@غير معرف
مشكلتنا انا احنا بنصدق اي حاجة كل واحد معاه شوية فيديوهات ملهاش اي لازمة يطلع يقولك دول خونة ودول عملاء زي مبارك لما كان بيقول علي المتاظهرين اجندات خارجية وكنتاكي بظبط
@غير معرف
ولما مبارك وولاده صدروا الغاز لاسرائيل مش دي عمالة ولما يكون ولاء مبارك وحكومته لامريكا مش دي عمالة
الحقيقه ان تعليق غير معروف مضبوط احنا بنسيب الاصل ونتكلم فى الفرع نفرض ان سبايدر صبى عالمة لكنه فى الآخر مصرىبيخاف على مصر وانا مصدق جزء كبيبر من كلامه لأن المتتبع للأحداث بدون انحياز وكان خلال فترة الثورة بيتابع وبيحلل وبيسمع وبيفهم حا يعرف ان كلامة مضبوط من او لالنت اللى طلعت فى قناه المحور وانتهاء ببعض البرامج الاخرى ففى برنامج منى الشاذلى ظهر وائل غنيم فى نفس البرنامج فى نفس اليوم مع فقرتين اول فقرة مع مجموعة من الشباب وانكر انهك كانوا يعرفوا بعض وان التظاهر كله لم يكن مرتب ثم ظهر فى الفقرة الثانية مع مجموعة ثانية وفى وسط الحديث قالوا انهم يعرفون بعض ولكن اتفقوا على اللا يظهروا ذلك، ثم قال واحد منهم ان مهمته كانت تحديد المسافات والتوقيت فكانوا يحسبون المسافة من الى ميدان التحرير وانهم من جماعة 6 ابريل . فى برنامج آخر بالتلفزيون المصرى ظهر المدعو د. عمرو وهو من الاسكندرية ومعه بلال فضل وآخرون منهم مخرج والداعية الدينى اعتقد اسمه معتز وذكروا انهم تدربوا فى الخارج على كيفية عمل حاله وضرب مثلا بأنهم كانوا يذهبون الى اماكن بعيده عن متناول امن الدولهويقوموا بلفت الانظار بطرق مختلفة وهكذا حاولوا يا جماعة تربطوا الاحداث وبلاش نظام القطيع اللى احنا عايشين فيه ومش كل ما واحد يحاول يقول الحق يبقى خاين وابن كذا وكذا
بصراحه يعني يا جماعه الحشرة دي اقل من اننا حتي نتكلم عليها لان دا انسان مررريض تماما عيل عنده جنون الشهره نفسه نفسه ومني عينه لما يمشي يقوله عليه اهو احمد خنفسه يا جماعه قسما بالله تجاهل الشخص دا يقتله قتل لوحده
حقيقى انتا يا سبايدر من اجمد الناس اللى شفتهم وسيبك من اعداء النجاح انتا ممكن تكون احسن سيكا فيكى يا مصر قوم ياااد من هنا مليتوا البلد بس يا جماعة كوميدى والله مع العلامة ثفيق عفاشة مع اترامى لعائلة عفاشة
احمد سبايد يتكلم الحقيقة و بالفيديوهات و الصور يعني بالدليل و انا واحد من الناس و بحبه جدا و متابعة برنامجة ربنا يخليه على الاقل بيفوقنا و بجد انا بحبك يا احمد سبايدر
احنا كدة مش بنحب نفهم لية احمد سبايدر جايب فيديوهات وكمان مش مصدقينو لية كدة وكمان كلامو صح وهو شب مثقف ربنا معاك يا احمد كلنا معاك وبنحبك ربنا يحميك ويبعد عنك الشروياريت ترحمو نفسكو شوية ربنا يهديكو
وائل غنيم للعلم والمعرفة عميل اسرائيلى امريكى وتصدقوا او ما تصدقوش انتوا حرين - المهم انه عميل ودا كلام أكيد
يا جماعة نهدا كلنا ونفكر بعقل لو كان كلام أحمد سبايدر كدب مكنش جاب بالدليل القاطع وبالصور وبالفيديو على كل الناس إللي بيتكلم عليهم دول .. وعلى فكرة الفيديو الموجود على نفس الصفحة قديم, وفي جزء تاني فيه حجات بتأكد كلامة دورو علية وأنتم تلاقوه ............. وتحياتي
عااادى واحد هيموت على الشهرة و اخلاقه زفت و دماغه و مناطق اخرى عنده مخرومة عايز ايه تانى من واحد تعبان على الاخر
خليها تكلك يا سبيدر و الهرش موش هينفعك
احنا مقتنعين جدا بيه العملة عارفين نفسهم واحمد مش بيجيب حاجة من عندو دى كلها فيديوهات صوت وصورة وبعدين كل اللى بيقولو بيحصل حقيقى وانا اعتقد قناة افراعين افضل قناة حقيقية
إرسال تعليق