اضحك مع هشام الصادق "احد الباكين علي الجلاد"

الثلاثاء, أبريل 05, 2011 تعليقان

يوم الاثنين اطل علينا شخص يسمي هشام الصادق بمقالة تحت عنوان "متلازمة ستوكهولم (مقطعانى)" وطبعا باين من عنوان المقال ان هشام من محبي المخلوع ومن مؤيديه يلا بقي نمسك المقال حتة حتة ونضحك سوا

ماذا أفعل يا إخوانى.. وقد نفذت كل أدوية المهدئات من الصيدليات المحيطة بمنزلى وقد وصلت درجة حرراتى إلى 400 درجه مئوية ونصحنى الدكتور بتسجيل ضغطى فى موسوعة جينيز للأرقام

طبعا خفة دم فوق العادة مش قادر امسك نفسي من الفقعة قصدي من الضحك بس برده من الواجب نقوله"شفاك الله وعفاك يابني" وعلي فكرة انا عندي دكتور كويس قوي للحالات دي ممكن اديلك نمرته

----------------------------------------------------------------------------------------------------

عندما ترى على الفضائيات أن ملايين الشعب السورى خرجت عن بكرة أبيها لتأييد الوريث بشار الأسد المحتلة أرضه منذ أربعين عاما والمتخاذل حتى اليوم عن إطلاق رصاصه واحدة باتجاه الجولان.. بينما بطل الحرب والسلام والمحافظ على كل شبر من أرضه حرة لمده 30 عاما قيد الإقامة الجبرية ينتظر المحاكمة.

بطل الحرب والسلام صح يا جماعة اصلكم متعرفوش الحقيقة بقي ولازم نقولها كلمة حق وهنتحاسب عليها حسني مبارك اللي حارب لوحده وكان بيطلع بالطائرة ويرمي الصواريخ ويرجع يركنها وياخد غيرها وبعدين نزل ارض المعركة يحارب العدو لوحده وهو اللي ساق الدبابات وهو اللي عبر خط بارليف وهو اللي رفع العلم وبعد انتهاء الحرب حسني هو اللي راح تل ابيب وعمل اتفاقية السلام مع اسرائيل
----------------------------------------------------------------------------------------------------

عندما تسمع أن الشعب الليبى بعد الضرب بالدبابات والصواريخ والرجم من الطائرات وكل الاسلحه التى لم تستخدم ضد اسرائيل ... بات مقتنعا بالبحث عن مخرج أمن للقذافى .. بينما الشعب المصرى العريق يستكثر الخروج الأمن على الرئيس مبارك الذى أمر الجيش بحماية الشعب فى أول يوم خرجت فيه ذخيرة حية من الشرطة

اولا:صح طبعا كلنا لسة فاكرين يوم طائرات ال F16 واللي المؤيدين قالك اصل اسرائيل كانت بتحتشد علي الحدود فالقائد اللي هو مبارك امر الطائرات بالتحليق لتحذير اسرائيل نشوف بقي الفيديو ده

بصراحة الطائرات دي كانت علامة لبد تنفيذ الامر لسحق المتظاهرين اللي رفضت القوات المسلحة تنفيذه
"لأ فعلا اصدر اوامر بحماية المتظاهرين <ونعم الحماية>"


ثانيا: الشعب الليبي عايز خروج امن للقذافي "ههههههههه" ده انت تحفة يراجل بعد كل اللي عمله فيهم تخيلوا انتوا الشعب الليبي عايز خروج امن للقذافي طيب نشوف بقي الفيديو ده

شفت الناس وهي بتهدد القذافي يبقي فين الخروج الامن "يا ننوس"
ياه مش متخيل شكلك لما تشوف الفيديو ده  والله يابني انت باين عليك انك متعرفش حاجة في اي حاجة اساساً ولا تعرف احوال الشعوب  ايه دلوقتي روح يابني تابع اخبار العالم بدل ما انت قاعد كدة تفقع في خلق الله اللي ليس لهم اي ذنب

----------------------------------------------------------------------------------------------------

عندما تسمع أن الشعب اليمنى الذى ما زال يعيش حياة الإنسان الأول.. يريد التغيير دون المساس برمز اليمن على عبد الله صالح

 اولا دي قلة ادب لما تصف شعب بالوصف الحقير ده ثانيا تقريبا "انت اللي عايش حياة الانسان الاول" ومش بتتفرج علي القنوات الاخبارية ولا ايه لان هتاف المتظاهرين اليمنيين منذ اليوم الاول "الشعب يريد اسقاط النظام" وبعد عنف الامن يريدون محاكمته الان وان صالح بيتفاوض عشان يكمل في الرئاسة ويفوض سلطاته لحكومة انتقالية وان الشعب اليمني رافض ويريد صالح ان يتنحي ونشوف مع بعضينا الفيديو ده

ها مين اللي عايش حياة الانسان الاول بقي
----------------------------------------------------------------------------------------------------
عندما تنشر جميع الصحف بما فيهم القومية فى الصفحة الأولى أن الاتحاد الأوروبى قد جمد حسابات لمبارك دون ذكر الرقم وتكتشف من بعض المواقع الغربية أن المبلغ المقصود لا يتعدى 30 مليون دولار.. فتصرخ أين هم ال 600 مليار دولار الذين تتهمون الرجل فيهم

محدش قال انهم 300 مليار احنا قولنا 70 مليار بس وبعدين انت مالك محموق قوي كدة ليه

----------------------------------------------------------------------------------------------------

عندما تنشر صحف اليوم أن 300 جهادى على وشك العودة إلى مصر أبرزهم شقيق قاتل السادات الإسلامبولى الصغير.. طبعا الشباب لن يعود من ألبانيا وأفغانستان لكى يتقاعد .. لا ( دا احنا حنتروق ) على رأى ممثل شهير

"ولا تقربوا الصلاة" نفسي تكمل الاية يا اخي  في لقاء المجلس الاعلي للقوات المسلحة برؤساء مجالس التحرير صرح المجلس العسكري حول ما تردد عن عودة عدد ضخم من قيادات الجماعات الإسلامية من الخارج وتأثير ذلك على الوحدة الوطنية، قال الملا إن وزير الداخلية أكد في بيان للوزارة عدم دخول أي من هؤلاء إلى مصر، وأضاف:«مواجهة الفكر يجب أن تكون بالفكر» مشددا على أهمية دور الأزهر الشريف في مواجهة الأفكار المتطرفة، وأكد أن من يريد أن يصل مصر وصدرت بحقه أحكام قضائية يجب أن تنفذ. p:

----------------------------------------------------------------------------------------------------

عندما تخسر البورصة 32 مليار جنيه فى 16 ثانية

عايز اسألك سؤال بقي كم خسرت مصر اثناء حكم مبارك؟

----------------------------------------------------------------------------------------------------

وعندما تتعرض مدينة السلام (مدينة الأمن والأمان ) شرم الشيخ إلى سطو مسلح فى سوبر ماركت

ياااااه اول مرة فعلا يحصل سطو مسلح في شرم الشيخ معلش اصل حسحس هو اللي كان محافظ علي الامن في شرم الشيخ ومصر
----------------------------------------------------------------------------------------------------
عندما يفوز السلفيون فى غزوه الصناديق الأولى فيقطعون أذن مواطن ويطردون آخر من محل سكنه.. ويبدءون فى تهديد بهدم الأضرحة وسلخ السافرات بماء النار ... لك أن تتصور ماذا سيفعلون عند الفوز بغزوة الصناديق الثانيه

واضح ان حضرتك بتسمع كلام الاعلام اليومين دول بس ياريت بقي تراجع الاخبار دي تاني بعد ما التحقيقات كشفت تفاصيلها لتعلم ان السلفيين ليس لهم دخل في هدم الاضرحة ولا قطع اذن هذا المواطن وان اللي قطعوا اذن هذا المواطن ليسوا سلفيين "وعلي فكرة مفيش في الاسلام حد بقطع الاذن" وارجو منك مشاهدة مؤتمر السلفية الاخير بجامع عمرو بن العاص الذين اعلنوا فيه انهم ضد هدم الاضرحة

----------------------------------------------------------------------------------------------------

عندما يتحول العسكرى الفريق سعد الشاذلى إلى بطل سياسى أوحد لحرب أكتوبر على حساب السياسى البطل محمد أنور السادات الذى اتخذ قرار الحرب وتحمل تبعاته ... وعلى حساب البطل مبارك الذى كرمه القائد الأعلى ولم يكرم الشاذلى نظرا لأخطائه فى أثناء الحرب وعلى حساب المشير الجمسى أيضا الذى كرمه السادات ولم يكرم الشاذلى

وليه متقولش انه اعتراف بدور هذا الرجل في الحرب بعدما اخفي ومحي سيدك مبارك  كل انجازات سعد الدين الشاذلي في الحرب بل ونسبها الي نفسه هههههه والله ضحكتني كلمة اخطاؤه اثناء الحرب مش مكسوف من نفسك وانت بتكتبها ايها اللواء اركان حرب هشام الصادق

----------------------------------------------------------------------------------------------------

على منوال قائده البرادعى الذى حضر ظهر يوم الاستفتاء خد شبشبين و طوبتين من أصدقائه الذين نصحوه ان يقول نعم فابى المهم خد المقسوم وعاد سريعا الى محاضراته فى جنيف

اظن انك عارف مين اللي خبطه الشبشبين والطوبة اكيد اللي انت خدت منهم المقال عشان تنشره صح صح ؟ وسؤال بقي تيجي انت ايه بجوار البرادعي؟

----------------------------------------------------------------------------------------------------

بينما نحن نعانى يوميا من استمرار المظاهرات المتسببه فى تفاقم المظاهرات الفئوية وتعطيل العمل بالمصالح و قلة الامن واحتقان الاقتصاد وارتفاع الأسعار وتوقف السياحة والصناعة تماما .عندما ترى كل هذا فتخرج الكلمات بدون إراده .. من هذا الحسنى مبارك السوبر مان الذى كان ظابطا ورابطا لكل هذه الأمور ومانعا لكل هذه الشرور ... وغاب فسبب كل هذا الارتباك ... يردون عليك بكل برود انها متلازمه ستوكهولم ... فأصرخ فعلاااااااااااااااااااااا فأنا مريض جدا وعلاجى الوحيد أن أعيش لفترة باستكهولم مثلكم ربما أعود بعد بضعة سنوات وقد انتهى تحويل بلادى إلى كوم تراب كما سبقتها فى ذلك العراق والسودان ولبنان والحبل على الجرار.

ياعيني براءة الذئب من دم ابن يعقوب فعلا المظاهرات الفئوية اللي بتحرض عليها الثورة ههههه طبعا انت مش عارف ان الجزء الاخير من مقالك الخيبان ده كشفك قولي ازاي؟

1-يظهر انك بتردد كلام الاسفين وللاسف انت مش عارف ان كلامهم اتحفظ خلاص زي "ان رحيل مبارك سبب الفوضي" "وان مصر هتبقي عراق ثاني"... الخ
2-فعلا كان حسني مبارك ظابط ورابط لكل هذه الامور وغيابه سبب كل هذا الارتباك عشان كان قامع الشعب كان مربيله الرعب كان حد يقدر يتكلم في السياسية ولا يجيب سيرة حسني ولا كان حد يقدر يتظاهر كان يروح علي المعتقل علي طول وينفخوه هناك, عرفت ليه يا حبيبي حسني كان ظابط ورابط 

وفعلا انت مريض بمتلازمة ستوكهولم عارف ليه؟

 بكل بساطة انك محب للعبودية ومحب لجلادك وتبكي عليه  وانصحك تروح لدكتور بجد؟

التصنيفات: الحال المايل